Khudkushi !!

Mai ghar walon ki pasand se shadi nahi karongi. Maine faisla karliya hai, hum dono bhag kay shadi kar lete hain, tum raat 1 baje sation pohanch jana. Agli raat 4 baje tak larki akeli apne sathi ka intezar karti rahi. Na aage jane ka koi rasta hai na peeche ja sakti hai. in sab ka hal Khudkushi.

Bache bhoook se bilak rahe hain, bill na ada karne par bijli aur gas cut chuki hai, malik makan ghar khali karne ka notice de chuka hai. Jaib mai phooti kori nahi hai na aage halat sahi hote nazar aa rahe hain. In sab ka hal Khudkushi.

Shadi kay foran baad maa baap ka inteqal hogya tau bhai ne palat kay pocha tak nahi. Susral wale olad na hone pe roz taane dete hain, shohar choti choti baat pe buri tarha marta hai, bahar aane jane pe pabandi hai. In sab se chutkaara pane ka hal Khudkushi.

Pore ghar walon ka bojh us kay kandon par hai, Bari behan ki shadi tau chote behan bhaiyon ko parhane ka kharcha, nokri ki talash mai nikalta hai aur roz khali hath lot'ta hai. Dost ehbab uska mazak urate hain, phooti qismat kay sath shakal o surat bhi wajibi hai, koshish kar kar kay thak chuka hai, In sab se farar ka hal Khudkushi.

Ye chnd wajohaat hain jis ki bina par dunya mai har 40 second bad koi na koi fard khudkushi kar raha hota hai. Islam mai khudkushi ko haram qarar diya hai is kay bawajood Pakistan jese mulk mai is rujhaan mai izafa hota ja raha hai aur chnd baras qabal tak ye tadad aaj kay muqable mai kahin kam thi.

Khudkushi darasal kisi shadeed zehni marz ki alaamat hoti hai. Ye esi kefiyat hai jis mai logon ko umeed ki qiran nazar nahi aati, zehan mai khushi ka koi tasawur nahi hota aur mustaqbil kay manzar namay par sirf mazi nazar aata hai. kehte hain kay Mayusi kufar hai. Yani khudkushi karne wala fard kufar bhi karta hai aur is kay bad haram maut bhi marta hai.

Logon ko jab apne samne koi madad karne wala nazar nahi aata tau wo masail par qaboo pane mai khud ko bebas mehsoos karte hain. Herat is baat ki hai kay logon ko Allah kay siwa bhi kisi ki madad ki zarurat hoti hai jo wo kisi ko hamdard na paate hoe ye iqdaam kar guzarte hain. Aakhir esa kiyon hota hai kay aik fard mayusi ki is had tak pohanch jata hai kay use Allah kay batae gae ehkamaat nazar nahi aate, Allah ki mohabbat nazar nai aati. Aik janib yaqini maut hoti hai aur dosri janib poori zindagi, uski ranginiyaan, musarrat, mohabbat, dunya ki dil kashi hoti hai, is kay bawajood log yaqini maut ki taraf qadam barha dete hain.

Mahireen kay mutabiq zingadi guzarne ki lazmi wasail ki kami, sehat o safai ki halat-e-zaar, dimaghi sehat ki sahoolat ka fuqdaan aur hamara kamzoor siyasi nizam is khatarnaak rujhaan ko rokne mai bebas nazar aata hai. Is rujhaan par qaboo pane kay liye sirf hukumat hi ko nahi balkay pore ma'ashre aur gher sarkari tanzeemo aur idaaron ko bhi aage ana hoga.

Is kay ilawa hame mahireen kay sath mil kar ye janna hoga kay logon ki bheer mai koi shakhs kab aur kiyon tanha hojata hai aur sehat mand zindagi ki taraf uski wapsi kese mumkin hai? Insan kay liye maut kab aur kiyon zindagi kay muqablay mai pur kashish aur awwaleen ban jati hai? Kiya ese logon ko Zara-e-Iblagh aur degar zaryon kay zarye se mo'sar pegham de kar maut ki rah par chalne se roka ja sakta hai ??