Aisa kiya hai jo hum aaj tak taraqqi yaftaa mumalik mai shumaar nahi ho sake? Kitne hukamran aae aur chale gae magar Pakistan aaj bhi wahin hai jahan pehle tha, balkay aur pasti ki taraf barh raha hai. Dunya kahan se kahan pohanch gai magar hum aaj bhi aaloo mai Allah ka naam talash kar rahe hain.
Parvez Musharraf ne apni Hukumat mai kaha tha k mulq kay halat badalne kay liye 5 saal kam hain. Tau kiya Shiar Shah Soori koi anokha insan tha jisko zindagi ne sirf 5 saal hukumat karne ka mauqa diya. 1940-1945 tak wo Hindustan ka Badshah raha, magar is arsay mai usne Hindustan ka naqsha badal kay rakh diya. Mehmood Ghaznavi, Muhammad bin Qasim, Mahateer Muhammad, Tipo Sultan waghera ye log bhi meri aur apki tarha sochne wale aam insan the. Phir in mai aisa kiya tha jo inko marne kay bad bhi amar kar giya? Pehle Musalman tajir ka itna charcha tha kay pehle log arab kay ilawa kisi aur ka maal kheedte tak nahi the. Aaj bhi Sri lanka jaaen tau wahan jo Ibrahim, Umar, Abu Bakar, Muhammad, Ali aur Usman milenge, ye tamam inhi gahikon ki ulaad hain jo arab Musalmano se sauda khareedne aae aur unki emaandari aur ikhlaq se mutasir ho kay Islam qabool kar liya. Aur ab tau ye haal hai kay kisi ashyaa mai "Made in Pakistan" likha ho tau hum use dekhte bhi nahi.
Hamare Hukumraano mai iqtadar ki is qadar bhook hai kay unhe apne aage peeche aur koi nazar nahi aata. Hamare Hukumraan Yoganda kay Sadar Eidi Ameen, Iran kay Badshah Shah raza Pehlvi aur Malqa Farha. Iraq kay baiq-waqt Army Chief, Sadar aur Wazeer-e-Azam Saddam Hussain aur Firon ki zindagiyon ko faramosh kar bethe hain. Inhe shayad ye nahi maloom kay har urooj ko zawal aata hai. Hamari hukumat ko sirf hath phelana aur jhukna aata hai. America hum pe drone hamle kar raha hai hum chup hain, wo Iraq Shaam pe hamle kar raha hai hum chup hain, wo ahista ahista hame bech kay kha raha hai hum tb bhi chup hain, aur wo din bhi door nahi jab America hamara haal bhi Hiroshima aur Nagasaki ki tarha kar dega aur yakinan hum tb bhi khamoosh hi rahenge.
Is dunya mai 61 Islami mumalik hain jin kay paas takriban 70 lakh foji hain. Jin kay pas atom, bomb, missile hain. Ye 61 mumalik kis taqat ka naam hain? Ye hamari bad naseebi hai kay ye 70 lakh Muslim foji Iraq ko nahi bacha sake. Ye log America ko lalkaar kay ye nahi keh sakte kay "Aaj kay bad kisi Muslim mulq ki taraf ankh utha kay bhi dekha tau poori dunya Sirinagar banjaegi aur Amrikiyon ko dunya mai mu chupanay ki jaga bhi nahi milegi." Farz karen agar koi Islami mulq kisi Isai mulq pe hamla kar deta hai, uska kiya natija niklega? Yakinan pura America aur Europe us mulq ko safa-e-hasti se mita dega. Is kay barqas America, Islami mumalik ka bhurta bana raha hai aur aalam-e-islam tamasha dekh rahi hai. Ye kiya hai?
Ye Allah aur us kay Rasool (S.A.W) ka faisla hai kay emaan qaaim ho tau Allah ka aik banda poori dunya kay liye kafi hota hai, lekin agar emaan mai dararen aajaen tau 70 lakh fojiyon ki bhi zalim kay mu par zalim kehne ki himmat nahi hoti.
No comments:
Post a Comment