FACEBOOK "aik nasha aur us k masail"

Halaat e hazira mai social networking sites to beshumaar hain jin mai se aik mashoor e zamana  Facebook bhi apne urooj per jati hui dikhai deti hai lekin ye aik bari bemari ban kar bhi samne arahi hai.Ye website 24 july 2004 mai wojood mai ai aur is k baani haward university k nafsiyaat parhne wale talib-e-ilm MARK ZUCKERBURG hain.Dunya k 212 mumalik mai taqreeban 1.3 crore logon ka facebook account hai jin mai se 618 laakh log rozana isey istemaal karte hain jab k 20 minute mai tasaweer,status updates aur bheje gaye peghamat ka apas mai tabadila hota hai.

18 se 34 saal tak k 48% log subha uthte hi apna facebook dekhte hain aur 28%  log apne smartphones k zarye bistar se nikalne se pehle apna account check karte hain.
 Is website per 69% khawateen games khelti hain aur aj kal ka mashoor tareen game criminal case hai.tehqeeq k mutabiq log apni har choti bari bat facebook per share karte hue nazar atey hain.

Agar ap apna facebook din mai do baar kholte hain ya apne apko phone k zarye facebook k notification dekhne se rok nahi parahe to iska asar seedha ap k dimagh per horaha hai jis k ba'is aap dimaghi beemariyon mai mubtila hosakte hai,Agar hum is nashe k itne aadi hochuke hain k daant saaf karne se pehle bhi isey dekhte hain to hum apni zindagi ka sukoon kho denge sath hi sath facebook logon ko samaaji sargarmiyon se dur karta hua dikhai deta hai,yahan tak k aik hi ghar mai rehne k bawujood bhi hum apne ghar walon aur rishtedaron ko sahi tareeqe se waqt nahi de paate aur yehi wajah hai k nau-jawan nasal per is k ghalat asraat murat'tib horahe hain.

Facebook ka nasha Cigrette ki manind hai k is ki adat dalna asan hai liken phir khatam chorna bohot hi mushkil hai.
Har cheez ka istemaal aik had tak hona chahye,jab tamam hudood uboor hojati hain to us cheez k ghalat asraat hone lagte hai aur yehi bat aesi tamam social networking sites k liye bhi hai jis ka beshumar istemaal hamein dimaghi tor per kamzor bana raha hai aur muashirey mai rishton ki ahmiat ko khatam kar raha hai.