Ishq-e-Haqeeqi

Insan ki zindagi bohat mukhtasar hoti hai aur har aam insan chahta hai kay wo apni is mukhtasar zindagi mai apni sari khuahishaat ko poora hota hua dekh lay. Is ki khuahishaat mai Paisa, Taraqqi, achi Mulazimat, Pur kholoos biwi/shohar aur Tabedaar bachay hote hain. Wo apni masroof tareen mamoolat-e-zindagi mai is qadar jakra hota hai kay use is kay ilawa kuch aur nazar nahi ata.

Magar aik khaas insan ki soch aam insan kay bar'aqas hoti hai. Wo apni aarzi zindagi se zaada abdi zindagi kay bare mai sochta hai. Use us zindagi ki zaada fikar hoti hai. Wo is kainaat kay aik aik zarre mai Allah ko talaash karta hai, Allah ki pervi karta hai aur Allah ki khushnoodgi hasil karna chahta hai, aur phir Allah bhi ese logon ko azmaish mai dalta hai. Phir parkhta hai kay kon hai jo ese halat mai bhi mojh hi se mang raha hai, mojh hi se madad ka talabgaar hai. aur beshak Allah ese logon ko nawazta bhi hai chahe dunyavi zindagi mai ya akhrivi zindagi mai.

Insan apni mukhtasar zindagi mai bohat talkh tajurbaat se guzarta hai. kuch log apne halat se samjhota kar lete hain aur kuch itne naumeed hojate hain kay pataal ki taraf girte chale jate hain, aur us waqt siwae Allah kay koi dosra uski madad nahi kar sakta.

Insan ishq-e-haqeeqi ki justuju mai jitna sir gardan rehta hai, uski piyaas utni hi barhti jati hai. Bohat se log ishq-e-haqeeqi ko samjh nahi paate, ya samjhna nahi chahte, ya inhe iski kabhi zarurut hi mehsoos nahi hoti. Aur jo insan ishq-e-haqeeqi ko samjh le phir use kisi aur sheh (cheez) ki talab nahi rehti.