HAWWA KI BETI

Pakistan mai insani huqooq ki surat e haal qabil e tareef nahi rahi,insani huqooq ki pamaali ki surat mai aurten ziada mutasir hueen hain.Watan e azeez mai aurat se rakhe jane wale ghair munsifana sulook ka rawayya qabil e muzzamat hai.
Ikeesween sadi mai bhi daur e jahiliyat apne urooj per dikhai deti hai,parha likha hona is bat ki tasdeeq nahi karta k logon mai insaniat ka ansar bhi paya jata hai ya nahi,hamare mulk mai parhe likhe log bhi aesi khaufnaak misaal qaim karte hain k dunya k liye wo ibrat sabit hojati hai.
Hamare mulk ki aurat har mamle mai imtiazi sulook samait deegar mamlaat mai bhi insaaf ki talib hai.kisi bhi gaon dhiyaat ki janib jab hum rukh karte hain to wahan Beti paida karna ik gunha samjha janey laga hai, ghairat k naam per qatl o ghaarat ab aik aam si bat hogai hai, aulaad na hona bhi ab aurat ki ghalti hai, jahaiz jaisi lanat ab hamare muasherey mai bemari ki taraha phail chuki hai aur agar koi larki ghar se bahar nikle chahe parhne ki khatir ya majburi k tehat,usko achi nazar se nahi dekha jata, Akhir Islam aur gherat ki aar mai aurat ko kab tak na-insafi ka samna karna parega??
 Dunya mai aurat wafa ki pekar to hai magar mehroomi ka mazhar bhi hai.fitrat ka sacha aks to hai magar samaaj ki bereham zanjeeron mai jakr hui bhi hai, kab tak hawwa ki beti apne haq k liye qanoon k darwazey khatkhatye gi??

Pakistan mai 90% feesad aurten gharelo tashadudd ka shikar banti hai,taqreeban 800 aurton ko gherat o karo kari k naam per qatal kar diya jata hai,baat yaheen akar khatam nahi hoti hadh to ye hai k ijtemai ziad'ti k bhi saal k andazan 300 muqaddemaat darj hote hain,aur ye wo tamam waqeyaat hain jin per hum nazre sani karte hain,bohot se aise bhi jaraim horahe hai k jo hamare wehm o guman mai bhi mojood nahi hain.


 Is sab k baad Pakistan jaisi Islami riyasat mai aurat ka koi pursan e haal nahi hai,jis k ba-is khawateen,larkiyon aur bachion per is ka ghalat asar par raha hai aur isi wajah se kaheen na kaheen Pakistan ki maeeshiyat ko bhi nuqsan pohonch raha hai.
Khawateen k khilaf tashadudd ki darja bandi mai Pakistan 93 mumalik mai se 82 number pe hai jis mai khawateen k sath na-insafi ki jati hai aur 2011 ki adam masawaat index mai pakistan 115 number per maujood hai.
Is nukta-e-nazar ko hukoomat sanjeedgi se soche aur kuch aesi mansooba bandi kare k khawateen k sath na-insafi ab na ho aur mujrim ko usk jurm ki saza mile aur sath hi sath khawateen ko tahafuzzat bhi diye jayen.dusra marhala aurton mai parhai ki shama ko roshan karaya jaye aur bunyadi taleem lazin o malzoom kardi jaye takey aurat apne huqooq se ba-khabar rahe aur apne haq k liye awaz utha sakey.

No Go Areas

Pakistan ka dil shehar-e-karachi jo pehle kbhi pur aman aur roshiniyon ka shehar kaha jata tha, kai saalon se bad amni ki lapet mai hai. Ab lagta hai kay halat kbhi sahi nahi honge. Ab tau yahan kay logon ne bhi halat se samjhota kar liya hai. Karachi ki bad hali aur bad amni aik taraf, yahan kuch ilaqe ese bhi hain jahan aam insan tau door ki baat police bhi jane se ghabrati hai.

 In ilaqon mai se aik ilaqa Afghan Basti kehlata hai. Aakhir ye basti Karachi mai kese abad hogai? Aur waqt kay sath sath esa kiya hua kay police bhi wahan jane se katraati hai? Afghanistan mai jab jang ka aaghaz hua tau Afghan Mahajireen Pakistan aagae. 80 ki dahai mai Karachi mai Afghan Basti banai gai. Jahan Uzbek, Turkmenistan, Chechen aur Tajik khud ko Afghan Mahjireen kehne wale pichle 30 saal se reh rahe hain. Ye basti andar se kahin se bhi Karachi ka hissa nahi lagti balkay azaad qabaili ilaqa lagta hai. Yahan par Pakistan ki saqafat ka shaaiba bhi nahi hai. Uzbek, Tajik aur Chechen ne apni apni saqafat aur tehzeeb qaaim ki hoi hai.

Afghan Basti mai bari tadaad kachra chunne walon ki hai. Yahan pe aik bhi sarkari school nahi hai. Ja baja madrsa hain aur godaam jahan bare bare taale lagae hoe hain aur jin ko madarson ka naam diya giya hai. Is basti mai pehle Uzbek, Tajik, Arab aur Afghan sath rehte the magar waqt kay sath sath bahimi ikhtalafat aur tanazat sir uthane lage. Jirga mai faisla hone kay baad aik ilaqa har qoam kay liye makhsoos kar diya giya. Is tarha aik basti kai bastion mai badal gai. Yahan pe bari tadaad Pashtoon Afghan Mahajireen ki hai. Ye qoam sbse alag thalag rehti hai. Yahan pe ese Arab bhi rehte hain jo aasani se arbi bolte hain magar unhe kisi kay samne arbi bolne ki ijazat nahi aur na hi ghulne milne ki ijazat hai.

Afghan Basti mai qanoon Afghanistan ka chalta hai. Yahan kay makeeno ka kehna hai kay ye basti qatai no go area nahi hai aur na hi yahan pe taliban hote hain balkay Karachi se zada pur aman ilaqa hai. Jab kay yahan kay aasat'za kehte hain kay madarson mai parhne wale bachon ko hum taliban hi kehte hain.

Bazahir dekha jae tau ye basti bhi aam bastion ki tarha dikti hai magar esa hai nahi. Aam ta'sub ye hai kay Karachi kay aksar wardaton kay taane baane yahin bune jate hain. Wahan kay makeen aazadana ghoom phir sakte hain magar hum wahan nahi ja sakte. In tamam baton kay baad zehan mai chand sawalat uthte hain. In 30 saalon mai Afghan Mahajireen ka koi aur thikana kiyon nahi banaya giya? Waqt guzarne kay sath ye basti no go area kiyon ban gai? Hukomat ne wahan pe aik bhi sarkari school kiyon nahi banwaya? Agar wahan taliban hain tau police ya rangers Afghan Basti operation kiyon nahi karti? Hukomat is basti kay khilaf kiyon koi iqdamat nahi karti? Karachi ka hissa hone kay bawajood aam awam wahan kiyon nahi jasakti? Najane in sawalon kay jawabat kab milenge aur ye guthee kab suljhegi.